Fantastisch, Fantastika, Hazo Fantastika

Zur Obwechslung san de Hofbauer Briada moi an Koasa aufn weg gwen. Uns zwor sans am Sonneck de Hazo Fantastika 7+ rotpunkt klettat. Onfongs woit ma de Scheh Direkt, wos si im Bereich 6+ - 7+ beweg,als Einstiegsvariantn geh. Owa aussakemma san oft de easchtn Längen vo da neun Tour vom Haselsberger Herbert und vom Nuss Hubert, de wos Haselnuss 8, gnonnt hom. De easchtn 4 längen wean so 7/7+ sei, echt lässig zum klettan. Nochdem ma de easchtn Längen hinta ins kob hom, san ma donn aufs Großbandl kemma, wo donn de eigentl. Tour de Hazo losgeht.

An den Tog hom ma a zum easchtn moi des mitn Rucksock nochziachn ausprobiat.

Es funktioniat echt ned schlecht, is zwor bissl Zeitaufwendiga, owa füan Nochsteiga scho lohnend.

Wos an da gonzn Soch recht interessant woh, is - wenn ma denkt, dass de Wond oda de Tour ca. 13 Seillängen und ca 450m hot und mia dafüa ziemlich genau 12h, nua füas klettan, braucht hom. Keine Ahnung wia ma des zombrocht hom. De letztn 2-3 Längen hom ma oft fost bei kompletter Dunklheit geh messn, wos oft eh nu bissl interessant woh, weil immahin a teilweise nu 6-, 6 Stelln dabei wohn. Und so top ausgerüstet wia ma wohn, hom ma natürlich koa Stirnlompn dabei kob, owa zur Not duat ois, und so hom ma ins mitn Berni sein Handy, ca. 1h long an Weg zu de Rucksäck oiche gleicht, wenigstens wo da Akku aufglond. Nochdem ma ins oft nu bei de Rucksäck a kloane Jausn gegönnt hom, san ma oft zum Auto gonga, wo ma oft um ca. 00.30 gschnochts oda in da Fria untn wohn. Also i dat sogn dass ma an Tog suppa ausgnutzt hom.