Chilln und Bouldan im Zillatoi

An kloan Nochtrog gibs vo de Unterlandla, de wos etz amoi üwas Wochenende im Sundagrund bouldan wohn. Am Freitog is üwahaubs a kloane Bruadaschoft aufn weg gwen, und zwor oamoi de Faistenauer Briada mitn Martin und an Hannes und de Hofbauer Briada mitn Bernhard und an Armin. Am Freitog hom ma mehr oda weniga a kloane Führung gmocht, weil da Haunä und Martin as easchte moi do wohn, und so hom ma moi poor Boulda oklappat, wo da Haunä und Armin donn sogor an Pinky and the Brain 7b damocht hom. Da Martin und Berni wohn a ned untätig und hom a poor 6b/b+, 6c boulda damocht z.b. Melchmaus, Birkhendl, Woup, Rechtl,.. .

Am Somstog wohn donn da Armin und Berni aloa aufn weg und hom si bissl mit da Moonwalk 7a+ beschäftigt, owa noch poor Vasuche hom si's lossn messn, weils nu bissl a Haut braucht hom. Zum Schluss hom ma ins donn nu an Urmentl Total 6b+ ugschaug, wos ma füa de Bewertung echt ned leicht findn. Nochdems go ned so wenig vasuche gmocht hom, is a an Armin oft decht nu aufgonga. Da Bernhard muas aufn naxtn Zillatoi besuch wortn, owa da Block wead jo ned dafu laffn.